Делегации од речиси сите помесни православни цркви денес пристигнаа во Тбилиси за да му оддадат последна почит на патријархот на Грузија, Илија II, во еден од најзначајните црковни собири во поновата историја.
Погребната богослужба во Катедралниот храм „Света Троица“ ја предводи Вселенскиот патријарх Вартоломеј, со сослужение на архиереи од Грузиската црква и бројни претставници од целиот православен свет.
Меѓу присутните се:
-Патријархот на Бугарија
-Архиепископот на Албанија
-Архиепископот на Чешка и Словачка
-Митрополитот на Америка и Канада
Делегации од патријаршиите во Александрија, Антиохија, Ерусалим, Србија и Романија
Присутни се и претставници на автокефалните цркви на Кипар, Грција и Полска, како и бројни дипломати и претставници на други верски заедници.
Православната црква на Украина нема свои претставници од причина што на ист ден се врши и погребот на Киевскиот Патријарх Филарет во Украина.
Илјадници верници се собраа во и околу катедралата, додека погребната поворка ќе се движи кон храмот „Света Сиони“, каде што ќе биде погребан патријархот.
Москва без високо црковно присуство
За разлика од широкото присуство на православните цркви, на настанот нема високи претставници од Московската патријаршија.
Руската православна црква е претставена преку делегација предводена од митрополитот Венијамин, поглавар на Белоруската православна црква, која е под јурисдикција на Москва.
Отсуството на патријархот Кирил и на други високи претставници од Московската патријаршија укажува на воздржан и дистанциран пристап кон овој значаен собир на православниот свет.
Црковни набљудувачи оценуваат дека ваквиот пристап ја отсликува тековната дистанца на Православната црква на Русија од заедничките собири со православниот свет, и тоа воопшто не ја нарушува општата слика на единството во Православната Црква.
Силен знак на единство
Присуството на голем број помесни цркви и нивното заедничко учество во богослужбата испраќа јасна порака дека православното единство се изразува преку литургиското заедништво.
Во тој контекст, погребот на Илија II не е само простување со еден голем духовен лидер, туку и сведоштво за заедничкото присуство и поврзаност на Православната Црква.
