Македонскиот духовник отец Гаврил Галев, игумен на манастирот „Свети Климент Охридски“ во Кинглејк, доби три високи признанија за неговиот долгогодишен духовен, културен и општествен придонес кон македонската заедница во Австралија.
Признанијата му беа врачени за време на свечената Илинденска прослава во Мелбурн, организирана од Македонската австралиска заедничка организација (MACO), како знак на благодарност и почит за неговата повеќедецениска служба меѓу Македонците во Австралија.
Особено значајно е што признанијата доаѓаат од различни институции, што сведочи за широкото почитување на неговата работа како во македонската заедница, така и во институциите на државата Викторија.
Отец Гаврил доби признание од Парламентот на Викторија, кое му го врачи пратеничката Натали Хачинс, за неговата континуирана работа, пожртвувана служба и поддршка на македонската заедница во Викторија.
Му беше врачено и признание од Владата на Викторија, од министерката Ингрид Стит, во соработка со Македонската австралиска заедничка организација (MACO), за повеќе од дваесет години посветена работа со младите, зачувување на македонската култура, традиција и идентитет, како и за неговото активно учество во општествениот живот на заедницата.
Третото признание доаѓа од Македонско-австралиската федерација на пензионери, а му го врачи претседателот на Федерацијата, Стојан Јанакиевски. Со него се оддава почит на долгогодишната посветеност, несебичната служба и исклучителниот придонес на отец Гаврил во духовниот и културниот развој на македонската заедница во Австралија.
Трите признанија се уште една потврда дека повеќедецениската служба на отец Гаврил Галев е високо ценета и препознаена не само меѓу Македонците во Австралија, туку и од австралиските институции.
Неговата работа во изминатите децении е особено поврзана со зачувувањето и пренесувањето на македонското духовно, културно и национално наследство на новите генерации Македонци во Австралија.
Извор: Macedonian orthodoxy in Australia and New Zealand
