Вселенскиот патријарх Вартоломеј упати повик до четирите православни автокефални Цркви кои не учествуваа на Светиот и Велик Собор на Православната Црква во Крит во 2016 година, повторно да ги разгледаат неговите документи и синодално да пристапат кон нивно усвојување.
Патријархот зборуваше по повод празникот на Светиот Дух, на 1 јуни, во храмот „Света Троица“ во историската заедница Ставродроми. Во своето обраќање тој потсети дека токму на понеделникот по Педесетница, пред десет години, започнале работите на Соборот во Колимбари, Ханија, под негово претседателство. Централната порака на Соборот била инспирирана од кондакот на Педесетница: „Сите ги повика кон единство“.
Вселенскиот патријарх нагласи дека Соборот на Крит го објавил православното единство, и покрај отсуството на четири автокефални Цркви „во последен момент“. Тој ги повика овие Цркви и нивните претстојатели повторно да ги проучат шесте соборски текстови и одлуки, како и Енцикликата и Посланието на Соборот, и синодално да ги прифатат. Според него, таквиот чин би бил соодветен израз на почит кон долгогодишниот труд и жртвите вложени од сите православни Цркви во подготовката на Соборот.
Во своето обраќање, патријархот Вартоломеј истакна дека Мајката Црква на Константинопол своите прерогативи не ги разбира како привилегии, туку како одговорност и жртвена служба за единството и стабилноста на светите Божји Цркви.
За време на празничната богослужба, Вселенскиот патријарх му го додели офикионот Велик проповедник на архимандритот Кесариј Хронис, архивар на Вселенската патријаршија. На настанот присуствуваа повеќе архиереи, меѓу кои митрополитите Мелитон Филаделфиски, Стефан Калиуполски и Мадитски, Јоаким Бурски, Теодор Селевкиски и Григориј Анкирски, како и генералниот конзул на Грција во Константинопол, амбасадорот Константинос Кутрас.
Патријархот упати и посебни зборови до учениците од историските училишта Зографион и Запион, охрабрувајќи ги да негуваат пријателства, да ги почитуваат постарите и да се стремат кон духовните височини на „убавото, големото и вистинското“.
По богослужбата, патријархот Вартоломеј ја посети малата изложба на црковни богатства, поставена во галеријата на храмот „Света Троица“.
Извор: orthodoxtimes.com
