Патријархот на Грузија г.г. Илија е хоспитализиран откако неговата здравствена состојба се влошила, а лекарите процениле дека е потребна итна медицинска интервенција.
Според официјалното соопштение од Грузиската патријаршија, Неговото Блаженство од денес се наоѓа на лекување во Медицинскиот центар „Кавказ“. Неговата состојба, како што се наведува, е сериозна, но стабилна.
„Молиме за вашите молитви“, соопштија од Патријаршијата.
93-годишниот патријарх Илија е највозрасниот поглавар на православна црква во светот и се наоѓа на чело на Православната црква на Грузија од 1977 година.
Тој ужива голема почит во земјата и, според општото мислење, важи за една од највлијателните личности во Грузија. И покрај возраста и нарушеното здравје, внимателно ги следи политичките и црковните случувања во земјата и надвор од неа.
За развојот на неговата здравствена состојба постојано е информиран и министерот за здравство на Грузија, Михаил Сарџвеладзе. Според информациите на civil.ge и изјавата на директорката на болницата, Сопио Аспанидзе, патријархот бил примен околу 3 часот по полноќ на одделението за интензивна нега поради масивно желудочно крварење.
Според министерот за здравство, крварењето е запрено, но неговата состојба и натаму се оценува како сериозна.
Извор: orthodoxianewsagency.gr
