Ерусалимскиот патријарх Теофил III изрази надеж дека наскоро ќе се одржи средба на поглаварите на древните православни патријаршии и на Архиепископот Кипарски.
Во интервју за неделното издание на весникот „Катимерини“, патријархот Теофил зборуваше за предизвиците со кои се соочува Ерусалимската патријаршија, која постојано настојува да ја зачува рамнотежата во регион обележан со големи културни и геополитички судири. Како што истакна, крајната цел е да се обезбеди непрекинатото присуство на православниот ромејски елемент во Светата Земја.
Патријархот, кој минатата недела престојуваше во Атина и оствари повеќе средби на високо ниво, беше прашан и за фактот дека поминале 12 години од последната средба на поглаварите на древните патријаршии и Архиепископот Кипарски.
„Средбите на поглаварите на древните патријаршии имаат особено духовно и црковно значење. Денешните околности и понатаму се исклучително сериозни. Блискиот Исток е погоден од војни и нестабилност, христијанските заедници се изложени на силни притисоци, а и православниот свет се соочува со предизвици и тензии“, истакна патријархот Теофил.
Тој нагласи дека секоја можност за средба и дијалог меѓу древните патријаршии, но и пошироко, е од голема важност.
„Целта на еден таков собир не би била политичка конфронтација, туку духовно расудување, заемно охрабрување и заедничко сведоштво во полза на мирот, единството и заштитата на христијанските заедници. Се надеваме дека наскоро ќе можеме да се сретнеме и заеднички да го изразиме ова сведоштво“, рече Ерусалимскиот патријарх.
Во интервјуто тој се осврна и на неодамнешната посета на Соединетите Американски Држави и средбата во Белата куќа со американскиот претседател Доналд Трамп.
Патријархот зборуваше и за потребата од поддршка и заштита на светите места во Светата Земја, како и за зачувувањето на нивниот историски статус кво.
Воедно, како значајна ја оцени иницијативата на грчката Влада за поддршка на древните патријаршии и за институционализирање на статусот „свештеници на дијаспората“.
Извор: orthodoxianewsagency.gr
