Патријархот на Ерусалим Теофил III денес, во вторник, 27 јануари, во седиштето на Ерусалимската патријаршија го прими премиерот на Република Албанија, Еди Рама, заедно со неговата сопруга. Средбата се одржа во рамките на регионалната турнеја на албанскиот премиер.
Патријархот Теофил III му посака добредојде на премиерот Рама и се осврна на долгогодишните односи меѓу Ерусалимската патријаршија и Албанија. Тој го истакна значајното место на Албанската православна црква во современата историја на Источна Европа, при што направи посебен осврт на блаженоупокоениот Митрополит Анастасиј (1929–2023), кој одигра клучна улога во обновувањето на Православната црква во Албанија по падот на комунистичкиот режим. Покоjниот Митрополит Анастасиј, пред да застане на чело на Црквата во Тирана, претходно служел во Ерусалим во текот на својата црковна служба.
Патријархот зборуваше и за меѓурелигискиот дијалог и за улогата на верските институции во регионот во намалувањето на тензиите преку одржување отворени и доверливи канали на комуникација. Тој ја потврди заложбата на Православната патријаршија на Ерусалим за урамнотежен дијалог и за зачувување на автохтоното христијанско присуство во Светата Земја.
Премиерот Рама ја изрази својата благодарност за приемот и ја оцени средбата како симболична и историски значајна, нагласувајќи ги вековните црковни врски меѓу двете страни. Тој изјави дека Албанија има намера и понатаму да отвора патишта за верски и културен дијалог на меѓународната сцена.
По завршувањето на средбата, Патријархот Теофил го одликуваше премиерот со Крстот на Пресветиот Гроб, како знак на благодарност за ангажманот на Албанија во регионалните иницијативи за дијалог во изминатите години.
На крајот од посетата, премиерот на Албанија, придружуван од својата сопруга и делегацијата, ја посети Црквата на Пресветиот Гроб, каде што беше примен од Архиепископот Исидор од Хиерапол.
Извор: Ерусалимска патријаршија
