Вселенскиот патријарх Вартоломеј во неделата, 7 јуни, присуствуваше на Божествената литургија во црквата „Света Троица“ во Вилнус, заедно со верниците на Егзархијата на Вселенската патријаршија во Литванија и официјални гости.
На крајот од богослужбата, Вселенскиот патријарх им го претстави на верниците новиот патријаршиски егзарх во Литванија, Неговото Преосвештенство епископот Панарет од Тамисос.
Во своето обраќање, патријархот Вартоломеј потсети на зборовите на апостол Павле: „Нема веќе Јудеец ни Елин, нема роб ни слободен“ (Гал. 3,28), нагласувајќи дека новиот егзарх е повикан да ја воплоти оваа црковна свест на жртва и литургиско единство.
Тој истакна дека мисијата на епископот Панарет целосно одговара на историската должност на Мајката Црква — постојано да се грижи за православните христијани кои имаат потреба од духовна поткрепа, каде и да се наоѓаат.
Вселенскиот патријарх посебно се осврна и на долгогодишната служба на епископот Панарет во свештениот центар на Православието, истакнувајќи го неговото познавање на рускиот јазик, како и способноста да богослужи на црковнословенски јазик според словенскиот типик. Според патријархот, тоа претставува „мост на утеха и канал на заедништво“ за повеќејазичното и длабоко рането паство во балтичките земји.
Патријархот Вартоломеј нагласи дека денешното време е обележано со темни и тешки околности, особено за бегалците кои пристигнуваат од Украина и од други погодени словенски земји, барајќи мир, безбедност и духовна поддршка.
„Тие се надеваат дека ќе го видат лицето на вистински духовен отец, а не на далечен административен службеник“, порача патријархот, додавајќи дека Вселенската патријаршија им ја пружа својата љубов и грижа преку својот егзарх.
Во своето обраќање, епископот Панарет истакна дека Вселенската патријаршија „не доаѓа да дели, туку да обединува“. Тој нагласи дека нејзината мисија не е да ги избрише личностите и народите, туку да ги воведе во заедницата на Светиот Дух преку пастирска грижа и служење.
Обраќајќи му се на патријархот Вартоломеј, епископот Панарет рече дека православните верници во Литванија во неговата личност ја гледаат „љубовната присутност на Мајката Црква, која не заборава ниту едно свое чедо, без оглед колку далеку се наоѓа“.
На историскиот настан присуствуваа и римокатоличкиот архиепископ на Вилнус, Гинтарас Грушас, апостолскиот нунциј архиепископ Георг Генсвајн, амбасадорите на Грција, Романија и Молдавија во Литванија, претставник на Амбасадата на Украина, како и претставници на Евангелско-лутеранската црква, дипломатскиот кор, јавните власти, општествени организации и верски заедници.
Вселенскиот патријарх Вартоломеј за време на посетата на Литванија е придружуван од старецот митрополит Халкидонски Емануил, великиот еклисијарх Аетиј, директор на Патријаршиската приватна канцеларија, и отец Епифаниј, трет ѓакон на Патријаршискиот двор.
Извор: orthodoxtimes.com
